హైదరాబాద్ నారాయణ కాలేజీ విద్యార్థిపై క్లాస్‌మేట్స్ దాడి, కేసు నమోదు
హైదరాబాద్‌లోని సంతోష్‌నగర్‌లో దారుణ ఘటన చోటుచేసుకుంది. నారాయణ జూనియర్ కళాశాలకు చెందిన 16 ఏళ్ల విద్యార్థిపై సహ విద్యార్థులు దాడికి పాల్పడి తీవ్రంగా గాయపరిచారు. ఈ ఘటనపై పోలీసులు కేసు నమోదు చేసి దర్యాప్తు ప్రారంభించారు.
సంతోష్‌నగర్‌లోని నారాయణ జూనియర్ కళాశాలలో అబ్దుల్ రెహమాన్ బిన్ ఖలీద్ (16) ఇంటర్ ద్వితీయ సంవత్సరం చదువుతున్నాడు. సోమవారం పరీక్ష పత్రాలకు సంబంధించిన విషయంలో అతడికి, మరో ముగ్గురు సహ విద్యార్థులకు మధ్య వివాదం నెలకొంది. కళాశాల సిబ్బంది జోక్యం చేసుకుని గొడవను సద్దుమణిగేలా చేసి విద్యార్థులను ఇళ్లకు పంపించివేశారు.
అయితే, కాలేజీ ముగిసిన తర్వాత ఇద్దరు విద్యార్థులు అబ్దుల్ రెహమాన్‌ను అడ్డగించి, ఫైట్ చేయాలంటూ సవాల్ విసిరారు. దీంతో అతను సంతోష్‌నగర్‌లోని 7బి గ్రౌండ్‌కు వెళ్లాడు. అక్కడ నిందితుల్లో ఒకరు అతడిపై విచక్షణారహితంగా దాడి చేయడంతో స్పృహతప్పి పడిపోయాడు. వెంటనే బాధితుడిని చికిత్స నిమిత్తం సమీపంలోని అప్నా ఆసుపత్రికి తరలించారు.
బాధితుడి తండ్రి ఖలీద్ బిన్ హుస్సేన్ ఇచ్చిన ఫిర్యాదు మేరకు ఐఎస్ సదన్ పోలీసులు కేసు నమోదు చేశారు. ఈ ఘటనలో ముగ్గురు విద్యార్థులపై భారతీయ న్యాయ సంహిత (బీఎన్ఎస్)లోని పలు సెక్షన్ల కింద కేసు నమోదు చేసి దర్యాప్తు చేపట్టినట్లు పోలీసులు వెల్లడించారు.
