సీఎం రేవంత్‌తో భేటీపై కోమటిరెడ్డి రాజగోపాల్‌రెడ్డి క్లారిటీ
హైదరాబాద్: ముఖ్యమంత్రి రేవంత్‌రెడ్డితో తన భేటీపై జరుగుతున్న ప్రచారానికి మునుగోడు ఎమ్మెల్యే కోమటిరెడ్డి రాజగోపాల్‌రెడ్డి తెరదించారు. నియోజకవర్గ అభివృద్ధి, నిధుల మంజూరు కోసం ముఖ్యమంత్రి, ఉప ముఖ్యమంత్రిని కలవడంలో తప్పేముందని ఆయన ప్రశ్నించారు. అభివృద్ధి పనుల కోసం వారిని కలవడం తప్పనిసరి అని, తన భేటీలకు రాజకీయ అర్థాలు ఆపాదించవద్దని కోరారు.
తనకు, సీఎం రేవంత్‌రెడ్డికి మధ్య అభిప్రాయ భేదాలు ఉన్నది వాస్తవమేనని రాజగోపాల్‌రెడ్డి స్పష్టం చేశారు. అయితే రాజకీయాల్లో భిన్నాభిప్రాయాలు సహజమేనని పేర్కొన్నారు.
తాను మంత్రి పదవి కోసం సీఎంకు లొంగిపోయానని కొందరు, మరోవైపు సీఎం-తన మధ్య విభేదాలు తారస్థాయికి చేరాయని మరికొందరు చేస్తున్న ప్రచారాన్ని ఆయన ఖండించారు.
‘‘ముఖ్యమంత్రిని కలిస్తే లొంగిపోయినట్లు.. కలవకపోతే దూరం పెరిగినట్లు రకరకాలుగా ప్రచారం చేస్తున్నారు. నేను, సీఎం ఘర్షణ పడాలని కొందరు కోరుకుంటున్నారు’’ అని రాజగోపాల్‌రెడ్డి వ్యాఖ్యానించారు.
మంత్రి పదవిపై అధిష్ఠానానిదే నిర్ణయం
మంత్రి పదవుల విస్తరణ పూర్తిగా కాంగ్రెస్‌ పార్టీ అధిష్ఠానం పరిధిలోని అంశమని రాజగోపాల్‌రెడ్డి తెలిపారు. గతంలో తనకు మంత్రి పదవి ఇస్తామని హామీ లభించిన విషయాన్ని గుర్తు చేశారు. అయితే అధిష్ఠానం తీసుకునే ఏ నిర్ణయానికైనా తాను కట్టుబడి ఉంటానని స్పష్టం చేశారు.
కొండా సురేఖ విషయంలో సీఎం తీరుపై ప్రశంసలు
మంత్రి కొండా సురేఖ వ్యవహారంలో సీఎం రేవంత్‌రెడ్డి వ్యవహరించిన తీరులో ఎలాంటి తప్పు లేదని రాజగోపాల్‌రెడ్డి అభిప్రాయపడ్డారు. ఈ విషయంలో సీఎం అధిష్ఠానానికి సరైన సమాచారాన్నే అందించారని పేర్కొన్నారు.
కాంగ్రెస్‌ ప్రభుత్వంలో నాయకులకు భిన్నమైన అభిప్రాయాలు ఉండటం సహజమేనని ఆయన అన్నారు.
ఇందిరమ్మ ఇళ్లపై కీలక వ్యాఖ్యలు
ఇందిరమ్మ ఇళ్ల పథకం కింద ప్రభుత్వం అందిస్తున్న రూ.5 లక్షల ఆర్థిక సాయం స్వల్ప మొత్తమేమీ కాదని రాజగోపాల్‌రెడ్డి పేర్కొన్నారు. పేదల ఇళ్ల నిర్మాణానికి ప్రభుత్వం అందిస్తున్న ఈ సహాయం ప్రాధాన్యమైనదని తెలిపారు.
