ఢిల్లీ క్రికెటర్లకు భారీ నజరానా.. రూ.1.43 కోట్ల ప్రైజ్‌మనీ పంపిణీ
న్యూఢిల్లీ: ఢిల్లీ అండ్ డిస్ట్రిక్ట్ క్రికెట్ అసోసియేషన్ (DDCA) 2025-26 సీజన్‌లో అత్యుత్తమ ప్రతిభ కనబరిచిన క్లబ్‌లు, క్రీడాకారులకు భారీగా నగదు బహుమతులు అందించింది. ఢిల్లీలోని అరుణ్ జైట్లీ స్టేడియంలో నిర్వహించిన వార్షిక అవార్డుల కార్యక్రమంలో మొత్తం రూ.1.43 కోట్ల ప్రైజ్‌మనీని పంపిణీ చేశారు.
గత సీజన్‌తో పోలిస్తే ఈసారి అన్ని విభాగాల్లో బహుమతుల మొత్తాన్ని 10 శాతం పెంచడం విశేషం. DDCA అధ్యక్షుడు రోహన్ జైట్లీ, కార్యదర్శి అశోక్ శర్మ, ఉపాధ్యక్షురాలు శిఖా కుమార్, కోశాధికారి హరీష్ సింగ్లా, సంయుక్త కార్యదర్శి అమిత్ గ్రోవర్ ఈ కార్యక్రమంలో పాల్గొన్నారు.
DDCA లీగ్ 40 ఓవర్ల టోర్నమెంట్, పురుషుల టీ20 లీగ్, హాట్ వెదర్ టోర్నమెంట్లలో విజేతలు, రన్నరప్‌లతో పాటు వ్యక్తిగతంగా అద్భుత ప్రదర్శన చేసిన ఆటగాళ్లను సత్కరించారు.
మహిళా క్రికెట్‌కు ప్రత్యేక ప్రోత్సాహం
మహిళా క్రికెట్‌ను ప్రోత్సహించే దిశగా DDCA ఈ ఏడాది కీలక నిర్ణయం తీసుకుంది. తొలిసారిగా మహిళల టీ20 లీగ్‌కు ప్రైజ్‌మనీ ప్రవేశపెట్టింది.
లీగ్‌లోని 10 గ్రూపుల విజేతలకు ఒక్కొక్కరికి రూ.2 లక్షలు, రన్నరప్‌లకు రూ.1.75 లక్షల చొప్పున నగదు బహుమతులు అందించారు. మహిళా క్రికెటర్లకు మరింత గుర్తింపు కల్పించడంతో పాటు, వారి భాగస్వామ్యాన్ని పెంచడమే ఈ నిర్ణయం ఉద్దేశమని DDCA ఉపాధ్యక్షురాలు శిఖా కుమార్ తెలిపారు.
ఢిల్లీ క్రికెట్‌ను అట్టడుగు స్థాయి నుంచే బలోపేతం చేయడానికి ఇలాంటి ప్రోత్సాహకాలు అందిస్తున్నామని అధ్యక్షుడు రోహన్ జైట్లీ తెలిపారు. నగదు బహుమతులు యువ క్రికెటర్లలో మరింత ఉత్సాహాన్ని నింపి, భవిష్యత్తులో ఉన్నత స్థాయికి ఎదగడానికి దోహదపడతాయని కార్యదర్శి అశోక్ శర్మ పేర్కొన్నారు.
