తెలంగాణ ఓటర్లకు కేంద్ర ఎన్నికల సంఘం కీలక ప్రకటన చేసింది. ఓటర్ల జాబితా ప్రత్యేక సవరణ (SIR) కార్యక్రమంలో క్లెయిమ్‌లు, అభ్యంతరాలు దాఖలు చేసే గడువును మరోసారి పొడిగించింది. తాజా నిర్ణయం ప్రకారం అక్టోబర్ 7వ తేదీ వరకు ఓటర్ల జాబితాపై అభ్యంతరాలు, క్లెయిమ్‌లు సమర్పించవచ్చు.
గత షెడ్యూల్ ప్రకారం ఈ ప్రక్రియకు సెప్టెంబర్ 16 వరకు మాత్రమే అవకాశం ఉండేది. అయితే ఓటర్ల జాబితా సవరణకు మరింత సమయం అవసరమని సీఎం రేవంత్ రెడ్డి, తెలంగాణ రాష్ట్ర ప్రధాన ఎన్నికల అధికారి సుదర్శన్ రెడ్డి ఈసీకి వేర్వేరు లేఖలు రాశారు.
ఈ విజ్ఞప్తులను పరిగణనలోకి తీసుకున్న కేంద్ర ఎన్నికల సంఘం గడువును అక్టోబర్ 7 వరకు పొడిగించింది. దీంతో ఓటర్ల జాబితాలో పేరు లేని వారు కొత్తగా నమోదు చేసుకోవడానికి, ఇప్పటికే ఉన్న వివరాల్లో తప్పులు ఉంటే వాటిని సరిచేసుకోవడానికి అదనపు సమయం లభించింది.
నవంబర్ 9న తుది జాబితా
అక్టోబర్ 7 వరకు అందిన క్లెయిమ్‌లు, అభ్యంతరాలను అధికారులు పరిశీలించి పరిష్కరించనున్నారు. అనంతరం నవంబర్ 9వ తేదీన తుది ఓటర్ల జాబితాను ప్రచురించనున్నారు.
అందువల్ల తెలంగాణలోని ఓటర్లు తమ పేరు, చిరునామా, ఇతర వివరాలను ఓటర్ల జాబితాలో ఒకసారి పరిశీలించుకోవడం కీలకం. ఏవైనా తప్పులు కనిపించినా లేదా పేరు నమోదు కాకపోయినా నిర్ణీత గడువులోగా సంబంధిత దరఖాస్తు ప్రక్రియను పూర్తి చేసుకోవచ్చు.
