హైదరాబాద్: నేచురల్ స్టార్ నాని, శ్రీకాంత్ ఓదెల కాంబినేషన్‌లో తెరకెక్కుతున్న ‘ది ప్యారడైజ్‌’ సినిమాపై ఆసక్తికర విషయాలు వెల్లడయ్యాయి. సెప్టెంబరు 24న సినిమా ప్రేక్షకుల ముందుకు రానున్న నేపథ్యంలో చిత్రబృందం విలేకరుల సమావేశం నిర్వహించింది. ఈ సందర్భంగా సినిమా ట్రైలర్‌పై హీరో నాని కీలక వ్యాఖ్యలు చేశారు.
‘ది ప్యారడైజ్‌’ సినిమాకు ప్రత్యేకంగా ట్రైలర్‌ విడుదల చేయడం లేదని నాని స్పష్టం చేశారు. ట్రైలర్‌ కోసం నాలుగైదు రోజులు కేటాయిస్తే సినిమా తుది పనులపై ప్రభావం పడే అవకాశం ఉందని చెప్పారు. విడుదలకు సమయం తక్కువగా ఉన్నందున ప్రస్తుతం సినిమా నాణ్యతతో పూర్తి చేయడంపైనే దృష్టి పెట్టామని తెలిపారు. సినిమా విషయంలో ఎలాంటి రాజీకి తావులేకుండా పనిచేస్తున్నామని పేర్కొన్నారు.
శ్రీకాంత్ ఓదెలపై నాని ప్రశంసలు
‘దసరా’ తర్వాత శ్రీకాంత్ ఓదెలతో కలిసి పనిచేస్తున్న నాని.. దర్శకుడి పనితీరును ప్రశంసించారు. పాటలు ప్రేక్షకులకు నచ్చేలా చేయడంలో శ్రీకాంత్ పాత్ర ఎంతో కీలకమన్నారు. పాట ఎలా ఉండాలి, ఎలాంటి సాహిత్యం కావాలి, ఎవరితో పాడించాలి అనే విషయాలపై ఆయనకు స్పష్టమైన అవగాహన ఉందని చెప్పారు.
తన పాత్ర లుక్‌లో జడలు, చేతిపై టాటూ వంటి మార్పులు చేసుకోవడానికి కూడా ఎలాంటి అభ్యంతరం చెప్పలేదని నాని తెలిపారు. సోషల్‌ మీడియా ట్రెండ్స్‌కు భయపడకుండా తన ఆలోచనను తెరపై చూపించే దర్శకుడు శ్రీకాంత్ ఓదెల అని కొనియాడారు. సినిమా పట్ల ఆయనకున్న పట్టుదల, ప్రేమ తనకు ఎంతో గర్వంగా అనిపిస్తాయని చెప్పారు.
తన కెరీర్‌లోనే అత్యంత కష్టమైన సినిమా
‘ది ప్యారడైజ్‌’ కోసం తన సినీ ప్రయాణంలోనే అత్యంత కష్టపడ్డానని నాని వెల్లడించారు. టీజర్‌లోని కొన్ని డైలాగ్స్‌ అర్థం కావడం లేదంటూ వచ్చిన విమర్శలపైనా స్పందించారు. కథలోని పాత్ర స్వభావం, ఆసక్తి దెబ్బతినకుండా కొన్ని విషయాలను ముందుగానే పూర్తిగా వెల్లడించలేమని తెలిపారు.
ఇది పూర్తిగా ‘పాన్‌ ఇండియా’ సినిమా కాదని నాని స్పష్టం చేశారు. తెలుగుతో పాటు ఇతర భాషల్లోనూ సినిమాను విడుదల చేస్తున్నామని చెప్పారు. తల్లి, కొడుకుల బంధం చుట్టూ కథ సాగుతుందని, హింసతో పాటు బలమైన భావోద్వేగాలు కూడా సినిమాలో ఉంటాయని వివరించారు.
2 గంటల 49 నిమిషాల రన్‌టైమ్‌
‘ది ప్యారడైజ్‌’ సినిమా రన్‌టైమ్‌ 2 గంటల 49 నిమిషాలు ఉంటుందని దర్శకుడు శ్రీకాంత్ ఓదెల తెలిపారు. ‘ఏష నాగుల’ పాట కోసం ఎవరిని ఎంపిక చేయాలా అని ఆలోచిస్తున్న సమయంలో కీర్తి సురేశ్‌ను సంప్రదించామని, ఆమె అంగీకరించారని చెప్పారు.
షూటింగ్‌ సమయంలో తనతో పాటు పలువురికి గాయాలయ్యాయని నాని తెలిపారు. అయితే అవి సాధారణమేనని పేర్కొన్నారు. సీనియర్ నటుడు మోహన్‌బాబుతో కలిసి పనిచేయడం మంచి అనుభవమని చెప్పారు. ఆయనను దగ్గరగా చూస్తే గతంలో ఉన్న అభిప్రాయం పూర్తిగా మారిపోతుందని నాని వ్యాఖ్యానించారు.
సినిమాకు ప్రీమియర్లు ఉంటాయని నిర్మాత సుధాకర్‌ చెరుకూరి తెలిపారు. టికెట్‌ ధరల పెంపుపై ఇంకా ఎలాంటి నిర్ణయం తీసుకోలేదని వెల్లడించారు.
